Presidenti Erdogan mesazh ngushëllimi për vdekjen e Papa Françesku

Presidenti i Turqisë, Recep Tayyip Erdogan, ka reaguar në lidhje me vdekjen e Papa Françeskut, liderit shpirtëror të katolikëve dhe kreut të Vatikanit. Në një postim në rrjetet sociale, Erdogan ka shprehur ngushëllimet e tij për humbjen e Papës, duke vlerësuar rëndësinë e tij si udhëheqës global dhe mbështetës i dialogut ndërfetar.

“Papa Françesku, një burrështetas i respektuar, ishte gjithashtu një udhëheqës shpirtëror që i kushtoi rëndësi dialogut midis grupeve të ndryshme fetare dhe mori iniciativën përballë tragjedive humanitare, përfshirë çështjen palestineze dhe gjenocidin në Gaza,” shkroi Erdogan në mesazhin e tij.

Presidenti turk theksoi gjithashtu solidaritetin e tij dhe të popullit të Turqisë me familjen e të ndjerit, shtetin e Vatikanit dhe komunitetin katolik botëror.

“Shpreh ngushëllimet e mia dhe të kombit tim familjes së të ndjerit, shtetit të Vatikanit dhe botës katolike,” përfundoi Erdogan.

Papa Françesku ndërroi jetë sot në moshën 88-vjeçare, pas një periudhe të shkurtër përkeqësimi të gjendjes shëndetësore. Ai ishte një figurë kyçe për dialogun ndërfetar dhe angazhimin për paqen dhe drejtësinë sociale, duke lënë një trashëgimi të paharrueshme për besimtarët katolikë dhe për botën në përgjithësi.

LEXONI GJITHASHTU:

• Çfarë ndodh kur një Papë vdes?
• Video| Dalja e fundit publike e Papës gjatë meshës së Pashkëve