Gjysmëfinale dramatike me 6 gola e spektakël, Barcelona dhe Inter ndahen në barazim

Barcelona dhe Inter kanë ofruar një përballje të jashtëzakonshme në ndeshjen e parë të gjysmëfinales së UEFA Champions League, e cila përfundoi me rezultatin spektakolar 3-3 në “Spotify Camp Nou”, duke lënë gjithçka të hapur për sfidën e kthimit në Milano.

Zikaltrit befasuan menjëherë, duke kaluar në avantazh që në sekondën e 31-të të takimit. Denzel Dumfries asistoi për Marcus Thuram, i cili me një lëvizje të bukur individuale dhe një “finte” elegante, zhbllokoi rezultatin.

Vetëm pak minuta më vonë, në minutën e 21-të, vetë Dumfries dyfishoi avantazhin për Interin me një realizim akrobatik brenda zonës.

Reagimi i katalanasve ishte i menjëhershëm. Lamine Yamal realizoi një gol të shkëlqyer pas një aksioni individual, duke ngushtuar shifrat dhe duke i dhënë impuls ekipit të tij.

Ferran Torres arriti të barazojë rezultatin në 2-2, pas një presioni të vazhdueshëm të vendasve.

Pavarësisht dominimit të Barcelonës në lojë dhe raste, Interi ishte klinik në sulm. Pas një goditjeje këndi, Dumfries gjeti golin e tretë personal dhe të skuadrës së tij.

Megjithatë, edhe këtë herë Barça reagoi, kur një gjuajtje e Raphinha-s që u përplas në traversë, u kthye nga portieri Yann Sommer në rrjetë për rezultatin përfundimtar 3-3.

Vlen të përmendet edhe goli i anuluar për Henrikh Mkhitaryan për pozicion jashtë loje në pjesën e dytë. Tashmë gjithçka mbetet për t’u vendosur në sfidën e kthimit në “Stadio Giuseppe Meazza”.

Një moment historik erdhi nga Lamine Yamal, i cili me golin e shënuar u bë lojtari më i ri që shënon në një gjysmëfinale të Champions League, duke thyer rekordin e mëparshëm të Kylian Mbappé të vendosur në vitin 2017.

LEXONI GJITHASHTU:

• Champions League, PSG dominon dhe fiton ndeshjen e parë ndaj Arsenalit në Londër
• Interi sfidon Barcelonën, katalanasit favoritë për kalimin në finalen e Champions