Trump kërkon më shumë kohë për problemet ekonomike amerikane

Presidenti Donald Trump ka kërkuar më shumë kohë për të adresuar problemet në ekonominë amerikane, e cila ka pësuar tkurrjen e parë pas tre vitesh rritjeje.

Të dhënat e fundit të Departamentit të Tregtisë tregojnë se ekonomia u tkurr me një normë vjetore prej 0.3% në tremujorin e parë të vitit, një rënie e dukshme pas një rritjeje prej 2.4% në periudhën pararendëse.

Në një deklaratë të mbajtur të mërkurën pasdite në Shtëpinë e Bardhë, përpara një grupi liderësh biznesi, Trump argumentoi se shifrat janë “mashtruese”, duke thënë se ato pasqyrojnë efekte të përkohshme nga grumbullimi i importeve përpara se të hynin në fuqi tarifat e reja të vendosura prej tij.

“Kjo është ekonomia e Bidenit sepse ne e morëm kontrollin më 20 janar,” tha Trump, duke hedhur fajin mbi paraardhësin e tij, Joe Biden, për të dhënat e dobëta ekonomike. “Mendoj se duhet të na jepni pak kohë që të lëvizim.”

Pavarësisht shifrave shqetësuese, Trump tha se janë premtuar rreth 8 trilionë dollarë investime të brendshme, të cilat, sipas tij, do të shërbejnë për të ringjallur aftësinë prodhuese të vendit dhe për të nxitur një kthesë ekonomike.

Komentet e tij kanë shkaktuar reagime të menjëhershme nga demokratët. Udhëheqësi i pakicës në Dhomën e Përfaqësuesve, Hakeem Jeffries, e quajti përpjekjen e Trumpit për të fajësuar Bidenin si një shpërfillje të përgjegjësisë.

“Kjo nuk është ekonomia e Joe Biden, Donald, është ekonomia juaj,” u shpreh Jeffries. “Është një ekonomi e dështuar, dhe populli amerikan e di këtë.”

Analistët paralajmërojnë se tarifat e importit të vendosura nga administrata Trump kanë ndikuar negativisht në tregtinë ndërkombëtare dhe në stabilitetin e tregjeve globale, duke shtuar presionin mbi ekonominë amerikane.

LEXONI GJITHASHTU:

• SHBA dhe Ukraina nënshkruajnë marrëveshje strategjike për energjinë dhe mineralet
• Marrëveshja për mineralet, Rubio: Moment historik, një hap drejt mbarimit të luftës