OKB: Ekipet në Gaza ende nuk kanë shpërndarë ndihma

OKB-ja ka njoftuar se ekipet e saj në Gaza ende nuk kanë arritur të shpërndajnë ndihmat, pavarësisht se dhjetëra kamionë me furnizime kanë hyrë në territorin palestinez gjatë dy ditëve të fundit.

Zyrtarët izraelitë raportuan se 93 kamionë hynë në Gaza të martën, duke transportuar ndihma si miell, ushqim për fëmijë, pajisje mjekësore dhe ilaçe farmaceutike. Megjithatë, OKB-ja theksoi se, pavarësisht hyrjes së kamionëve në anën palestineze të pikës kufitare Kerem Shalom, ende nuk është shpërndarë asnjë ndihmë.

Izraeli, duke u përballur me presion ndërkombëtar, ra dakord të dielën që të lejojë hyrjen e një “sasie bazë ushqimi” në Gaza, në një kohë kur ekspertët globalë paralajmërojnë për një krizë ushqimore të mundshme.

Në ndërkohë, presioni ndaj Izraelit ka vazhduar të rritet, me Mbretërinë e Bashkuar që ka pezulluar bisedimet tregtare për shkak të përshkallëzimit të dhunës në Gaza, të cilën e ka cilësuar si “moralisht të pajustifikueshëm”. Nga ana tjetër, një zëdhënës i jashtëm i Izraelit ka deklaruar se presioni ndërkombëtar “nuk do ta devijojë Izraelin nga rruga e tij në mbrojtjen e ekzistencës së tij”.

LEXONI GJITHASHTU:

• Britania e Madhe merr masa kundër Izraelit, shkak ofensiva në Gaza
• Në përpjekje për konstituim të Kuvendit, mblidhen sërish sot deputetët në Kosovë