Sulmohet me armë në Zubin Potok grupi i alpinistëve nga Kosova, reagon Vjosa Osmani

Një grup prej 50 personash ka qenë duke bërë ngjitje në malet mbi liqenin e Ujmanit, në zonën e Zubin Potokut e populluar me shumicë serbe, kur dy persona kanë qëlluar me armë zjarri.

Sipas organizatorëve, paraprakisht policia ka qenë e njoftuar për ecjen, por gjatë rrugës ata kanë hasur në dy persona që kanë shtënë me armë zjarri në afërsi të tyre.

Pas incidentit grupi ka ndërruar destinacionin e ecjes, ndërsa rastin e kanë denoncuar edhe në polici. Fatmirësisht nga ky incident nuk ka të lënduar

Lidhur me këtë ngjarje ka reaguar edhe presidentja Vjosa Osmani e cila ka kërkuar nga organet e rendit që të zbardhin sa më parë ngjarjen që sipas saj synon përhapjen e frikës dhe ndjenjës së pasigurisë në atë pjesë të vendit tonë.

“Dënoj sulmin e armatosur ndaj grupit të të rinjve nga “Kosova Mountain Club” në malet afër Zubin Potokut. Çdo qytetar i Republikës së Kosovës duhet të ndihet i lirë dhe i sigurt gjatë lëvizjes në secilën pjesë të territorit të Kosovës.

Ftoj organet e rendit dhe hetuesisë që të vazhdojnë punën në mënyrë që sa më parë të zbulojnë dhe dënojnë autorët e këtij akti kriminal që synon përhapjen e frikës dhe ndjenjës së pasigurisë në atë pjesë të vendit tonë”, shkruan Vjosa Osmani në Facebook.