“PD sapo ankimoi edhe Durrësin në KAS”, flet përfaqësuesi ligjor i PD

Franc Nuri, përfaqësues ligjor i Partisë Demokratike tha në Euronews Albania se përveç qarqeve Shkodër, Kukës, Fier, Lezhë, Dibër, Korçë, Berat, Vlorë dhe Gjirokastër, ku Partia Demokratike ka ankimuar në KAS zgjedhjet e 11 majit, tashmë shtohet ankimimi dhe në qarkun e Durrësit.

Nuri thekson se kanë ardhur edhe kallëzime të tjera, qoftë anonime apo dhe nga subjektet lidhur me zgjedhjet. Më tej, ai sqaron denoncimet apo kallëzimet penale që PD ka referuar.

“Vi nga KQZ,  isha në protokoll dhe sapo dorëzova ankimimin e Durrësit, është dorëzuar para pak minutash.

Provat janë të gjithanshme. Provat i kanë grumbulluar degët, kandidatët, drejtuesit politik, strukturat. Janë prova që ne i kemi mbledhur përpara muajit janar. Të gjitha denoncimet që kemi bërë po i risjellim këtu, kallëzimet penale poashtu i kemi referuar. Po i referojmë vendimet e qeverisë për faljen e gjobave. Për këto në SPAK ka vajtur Partia Demokratike, eksponentë, drejtues politikë për raste të caktuara. Për rastin e Kukësit, unë nuk isha në dijeni të çdo kallëzimi që mund të ishte bërë.

Gjatë seancës, u urdhërua nga trupa e KAS-it që administrata e KQZ-së të merrte informacion zyrtar. Na erdhi informacioni sot dhe doli që ishin 5-6 kallëzime. Kallëzime anonime, kallëzime nga subjektet, pra që përkisnin me krime zgjedhore të mundshme.

Pra, çdo gjë që vlen për të treguar se këto zgjedhje ishin të parregullta dhe tjetërsimi i vullnetit të qytetarëve ka ndodhur para se të futet në kutinë e votimit, i shërbejnë PD-së për të faktuar këtë manipulim që ne e quajmë farsë elektorale”, tha Franc Nuri.