Ukraina kryen sulmin më të madh me rreze të gjatë ndaj Rusisë

Ukraina njoftoi të dielën se ka përfunduar një nga sulmet më të mëdha me rreze të gjatë veprimi kundër Rusisë që nga fillimi i luftës, duke përdorur një flotë prej 117 dronësh për të goditur katër baza ushtarake ruse.

Sulmi, i koduar me emrin “Rrjeta e Merimangës”, u organizua nga Shërbimi i Sigurisë së Ukrainës (SBU) dhe synonte avionët strategjikë rusë.

Sipas Presidentit Volodymyr Zelensky, sulmet goditën 34% të transportuesve rusë të raketave lundruese, duke e konsideruar këtë një arritje të rëndësishme në përpjekjet për të reduktuar kapacitetet ajrore të Rusisë. Burime nga SBU thanë për BBC News se operacioni ishte përgatitur për më shumë se një vit e gjysmë dhe se dronët ishin kontrabanduar në Rusi për të realizuar goditjet.

Rusia konfirmoi se sulmet goditën pesë rajone dhe i quajti ato një “akt terrorist”, duke shtuar se po analizohen pasojat dhe dëmet.

Ndërkohë që tensionet në terren mbeten të larta, përfaqësues nga të dyja palët – Ukraina dhe Rusia – pritet të takohen në Stamboll të hënën për një raund të dytë bisedimesh për paqe, në përpjekje për të gjetur një zgjidhje diplomatike për konfliktin.

Nga ana tjetër, Ukraina raportoi një valë të re sulmesh ajrore nga Rusia gjatë fundjavës. Në Kharkiv, të paktën gjashtë persona, përfshirë një fëmijë shtatëvjeçar, mbetën të plagosur si pasojë e një shpërthimi me bombë në orët e para të së hënës, sipas guvernatorit të rajonit.

LEXONI GJITHASHTU:

• Sulmet izraelite në Gaza vrasin 32 persona në 24 orë
• Ministri i Jashtëm për mediat greke: Angazhohemi për zgjidhje të drejtë për “detin”