Ministri iranian: Së shpejti do të publikojmë dokumente “sensitive” izraelite

Dokumentet e ndjeshme izraelite të marra nga Irani duhet të publikohen së shpejti, tha sot në televizionin shtetëror ministri iranian i Inteligjencës, Esmail Khatib, duke e përshkruar atë si një “zbulim të çmuar” që do të forcojë aftësitë ofensive të Teheranit.

Mediat shtetërore iraniane raportuan të shtunën se shërbimet iraniane të inteligjencës kishin siguruar një sasi të madhe dokumentesh të ndjeshme izraelite, të cilat, sipas ministrit, lidhen me objektet bërthamore të Izraelit, lidhjet e vendit me SHBA-në, Evropën dhe vende të tjera, si dhe aftësitë mbrojtëse të Izraelit, raportoi Reuters.

Siç u tha nga agjencia, Izraeli ende nuk ka komentuar mbi këto akuza.

Nuk është e qartë nëse mënyra se si janë siguruar këto dokumente lidhet me sulmin e dyshuar kibernetik ndaj një qendre kërkimore bërthamore izraelite vitin e kaluar, të cilin Teherani e ka zbuluar vetëm tani për shkak të tensioneve të larta mbi programin e tij bërthamor, raporton Reuters.

“Për të bërë këtë zbulim, u desh shumë kohë dhe masa sigurie. Mënyra se si u morën dokumentet sigurisht që do të mbetet informacion konfidencial, por ato do të publikohen së shpejti”, theksoi Hatib, duke shtuar se “do të ishte një nënvlerësim” që bëhet fjalë për mijëra dokumente.

Kryeministri izraelit Benjamin Netanyahu tha në vitin 2018 se agjentët izraelitë ranë në posedim të një arkivi të madh dokumentesh iraniane që tregonin se Teherani po kryente një numër më të madh aktivitetesh bërthamore nga sa dihej më parë.

LEXONI GJITHASHTU:

• Irani pretendon operacion masiv spiunazhi kundër Izraelit
• OKB: Irani po rrit pasurimin e uraniumit