Nga Dubai në Tiranë, dalin pamjet e ekstradimit të vëllait të Nuredin Dumanit

Policia e Shtetit ka publikuar pamjet e ekstradimit nga Emiratet e Bashkuara Arabe në Tiranë të dy personave të akuzuar për pjesëmarrje në grupe kriminale, të cilëve GJKKO u ka caktuar masën e arrestit me burg.

Personi i parë i ekstraduar është vëllai i Nuredin Dumanit, 40-vjeçari Dashnor Dumani, të cilit në vitin 2024, GJKKO i ka caktuar masën e sigurisë “Arrest në burg”, për veprat penale “Vrasja në rrethana të tjera cilësuese”, “Vjedhja me armë” dhe “Mbajtja pa leje dhe prodhimi i armëve, armëve shpërthyese dhe i municionit“, kryer në kuadër të organizatës kriminale. Ky shtetas akuzohet se:

“Në vitin 2018, në fshatin Bradashesh, ka pasur rolin e ekzekutorit në vrasjen e shtetasve E. A., A. D. dhe E. D. ndërsa në vitin 2019, bashkë me shtetasin A. N., ka djegur një nga automjetet e përdorura gjatë vjedhjes me armë të shumës së parave në Rinas”, thuhet në njoftim.

Po ashtu Dashnor Dumani është dënuar nga Gjykata e Durrësit, në vitin 2016, me 4 vjet e 4 muaj burgim, për veprën penale “Mbajtja pa leje dhe prodhimi i armëve, armëve shpërthyese dhe i municionit“ nga të cialt i kanë mbetur për të vuajtur 1 vit e 4 muaj burgim.

Personi i dytë i ekstraduar është 36-vjeçari Armis Stafa të cilit GJKKO, në vitin 2024, i ka caktuar masën e sigurisë “Arrest në burg”, për veprën penale “Pastrimi i produkteve të veprës penale ose veprimtarisë kriminale”, kryer në kuadër të organizatës kriminale.

Ky shtetas akuzohet se ka pastruar, nëpërmjet shitblerjes së automjeteve, paratë e vëllezërve Çopja të dyshuara si të përfituara nga veprimtari kriminale.

Policia njofton se këta 2 shtetas janë kapur nga Policia e Dubait, si rezultat i sigurimit dhe shkëmbimit të shpejtë të informacioneve nga strukturat e specializuara të Policisë së Shtetit.

Njoftimi i plotë i policisë

“Vijon bashkëpunimi shumë i ngushtë me partnerët në Emiratet e Bashkuara Arabe, për të lokalizuar, kapur dhe ekstraduar shtetasit e shpallur në kërkim ndërkombëtar, që synojnë t’i fshihen drejtësisë shqiptare.

Ekstradohen nga Dubai në Shqipëri, 2 shtetas të shumëkërkuar, pjesëtarë të një organizate kriminale që akuzohet nga GjKKO, për kryerje të krimeve të rënda.

Si rezultat i këtij bashkëpunimi solid të realizuar nëpërmjet Interpol Tiranës dhe Interpol Abu Dhabit, në kuadër të operacionit ndërkombëtar, të koduar “The Wanted”, u finalizuan procedurat për ekstradimin në Shqipëri, të shtetasve shqiptarë, të shpallur në kërkim ndërkombëtar:

-D. D., 40 vjeç, pasi GjKKO-ja, në vitin 2024, i ka caktuar masën e sigurisë “Arrest në burg”, për veprat penale “Vrasja në rrethana të tjera cilësuese”, “Vjedhja me arme” dhe “Mbajtja pa leje dhe prodhimi i armëve, armëve shpërthyese dhe i municionit“, kryer në kuadër të organizatës kriminale. Ky shtetas akuzohet se:
٠në vitin 2018, në fshatin Bradashesh, ka patur rolin e ekzekutorit në vrasjen e shtetasve E. A., A. D. dhe E. D.;
٠në vitin 2019, bashkë me shtetasin A. N., ka djegur një nga automjetet e përdorura gjatë vjedhjes me armë, të shumës së parave, në Rinas.

Gjithashtu, 40-vjeçari është dënuar nga Gjykata e Durrësit, në vitin 2016, me 4 vjet e 4 muaj burgim, për veprën penale “Mbajtja pa leje dhe prodhimi i armëve, armëve shpërthyese dhe i municionit“. Nga ky dënim, atij i kanë mbetur për të vuajtur 1 vit e 4 muaj burgim;

-A. S., 36 vjeç, pasi GjKKO-ja, në vitin 2024, i ka caktuar masën e sigurisë “Arrest në burg”, për veprën penale “Pastrimi i produkteve të veprës penale ose veprimtarisë kriminale”, kryer në kuadër të organizatës kriminale. Ky shtetas akuzohet se ka pastruar nëpërmjet shitblerjes së automjeteve, paratë e shtetasve F. G. alias F. Ç. dhe H. B. alias H. Ç., vëllezër, të dyshuara të përfituara nga veprimtari kriminale.

2 shtetasit u kapën nga policia e Dubait, si rezultat i sigurimit dhe shkëmbimit të shpejtë të informacioneve, nga struktura të specializuara të Policisë së Shtetit”, thuhet në njoftim.

LEXONI GJITHASHTU:

• Ekstradohen nga Dubai dy të shumëkërkuar, njëri është vëllai i Nuredin Dumanit
• “2 mln € për kokën e Erionit”- Alibej rrëfen bisedat e Dumanit me ushtarët e Çopjave