Fenomeni i “shtëpive të barit”, rriten rastet e kultivimit të kanabisit në mjedise të mbyllura

Kultivimi i kanabisit me llamba në mjedise të mbyllura duket se po kthehet në një fenomen. Në harkun kohor të 1 muaji, policia ka zbuluar 4 raste, ndërsa shqetësimi është ngritur edhe nga shërbimi informativ i shtetit. Burime nga policia bëjnë me dije për Euronews Albania se metoda është e njëjtë me ato që njihen si “shtëpitë e barit” në Britaninë e Madhe dhe Spanjë.

Mundësitë e kufizuara për të kultivuar kanabisin në tokë të hapur për shkak të monitorimit ajror nga Guarda Di Dinanza italiane, po shtyjnë trafikantët të ndjekin një tjetër strategji. Godina të braktisura, banesa në pamje të parë normale apo papafingo të godinave të ndryshme po kthehen në laboratorë të kultivimit të kanabisit me llamba.

Vetëm në harkun kohor të një muaji policia ka zbuluar katër raste, dy në Lushnje, një në Lezhë dhe një tjetër në Durrës. Në të gjitha rastet mjediset e përshtatura për kultivim ishin pajisur me pajisje speciale nga llambat, aspiratorët e fuqishëm dhe sistemin e ujitjes së bimëve narkotike, ndërsa disa persona janë arrestuar mes tyre edhe punonjës së operatorit të shpërndarjes së energjisë elektrike pasi nuk kanë përmbushur detyrën, duke mos kontrolluar linjën dhe matësin e energjisë elektrike.

Burime nga policia e shtetit bëjnë me dije se ato që njihen si “shtëpitë e barit ” janë thuajse identike me laboratorët në Britaninë e madhe dhe Spanjën ku grupet shqiptare janë kthyer në problem për autoritetet. Madje shqetësimin për këtë fenomen e ka ngritur edhe shërbimi inteligjent shqiptar pak kohë më parë.

Po ashtu burimet thonë se trafikantët janë joshur të investojnë në këtë strategji për shkak edhe të rritjes së çmimit të kanabisit. Nga ana tjetër, Drejtoria e Përgjithshme e Policisë ka urdhëruar që muajin shkurt të evidentohen zonat dhe risk dhe të kontrollohen ish godina të braktisura të ushtrisë, tunele apo bunkerë.

Euronews Albania mëson se këtë të premte kryepolici Ardi Veliu do të zhvillojë një takim për planin anti-kanabis në rajonin e jugut që përfshin drejtoritë vendore të policive Fier, Vlorë dhe Gjirokastër.