Trump: Largimi nga G7 s’ka të bëjë me armëpushimin Izrael-Iran

Donald Trump ka hedhur poshtë komentet e Presidentit francez Emmanuel Macron, i cili tha se largimi i tij i parakohshëm nga samiti i G7 në Kanada kishte të bënte me një përpjekje për të arritur një armëpushim midis Izraelit dhe Iranit.

Trump e ka quajtur këtë një gabim, duke theksuar se largimi i tij nga samiti nuk kishte asnjë lidhje me një mundësi armëpushimi.

Në një postim në platformën e tij Truth Social, Trump shkroi: “Macron gabimisht tha se unë u largova nga Samiti i G7 për t’u kthyer në Uashington për të punuar për një ‘armëpushim’ midis Izraelit dhe Iranit. Gabim! Ai nuk ka idenë pse po shkoj tani në Uashington, por sigurisht që kjo nuk ka të bëjë fare me një armëpushim. Ka diçka shumë më të madhe se kaq.”

Komentet e Trump erdhën pas deklaratës të bëra nga Macron, i cili tha më herët të hënën se presidenti amerikan kishte bërë një ofertë për një armëpushim ndërmjet Izraelit dhe Iranit. Macron shtoi: “Ekziston me të vërtetë një ofertë për t’u takuar dhe për të shkëmbyer mendime. U bë një ofertë posaçërisht për të arritur një armëpushim dhe për të nisur më pas diskutime më të gjera.”

Trump u largua herët nga samiti i G7 në Kanada për t’u kthyer në Uashington për shkak të situatës në Lindjen e Mesme.

LEXONI GJITHASHTU:

• Trump largohet para kohe nga Samiti i G7: Irani të ndalojë programin bërthamor
• Izraeli vret Ali Shadmanin, komandanti më i lartë ushtarak iranian