Senati Amerikan miraton me vështirësi projektligjin e madh të Trump

Pas orësh debat dhe ngërçi, republikanët në Senatin e SHBA-së miratuan të martën mega-projektligjin e presidentit Donald Trump mbi taksat dhe shpenzimet, duke kaluar një nga pengesat kryesore në procesin legjislativ.

Akti i quajtur “One Big Beautiful” u miratua pas më shumë se 24 orësh diskutimesh me votën përfundimtare të zëvendëspresidentit JD Vance. Miratimi u prit me duartrokitje nga republikanët, ndërsa demokratët shprehën mosmarrëveshje.

Tani projektligji do t’i kthehet Dhomës së Përfaqësuesve, ku ende priten sfida, pasi një version i mëparshëm ishte miratuar vetëm me një votë diferencë nga republikanët.

Trump i kishte vënë Kongresit, të kontrolluar nga republikanët, afat deri më 4 korrik për të miratuar projektligjin për nënshkrimin e tij.

Debatet mbi deficitin, programet sociale dhe nivelin e shpenzimeve kishin shkaktuar përplasje brenda partisë, duke bërë që udhëheqësi i shumicës në Senat, John Thune, të humbiste mbështetjen e tre republikanëve – Susan Collins, Thom Tillis dhe Rand Paul – të cilët bashkë me demokratët votuan kundër.

LEXONI GJITHASHTU:

• Trump: Izraeli pranon kushtet për armëpushim 60-ditor në Gaza, fillojnë bisedimet
• Shpërndanë eksplozivë në disa vende turistike, 2 të arrestuar në Tajlandë