Kurti pas takimit me Osmanin: Presim takimet e tjera për progresin e Kuvendit

Kryetari i Lëvizjes Vetëvendosje, Albin Kurti, deklaroi se do të bëjë “çmos” për të mundësuar konstituimin e Kuvendit të Kosovës, pas takimit me presidenten Vjosa Osmani, në kuadër të përpjekjeve për zhbllokimin e ngërçit politik.

Në një prononcim për mediat, Kurti tha se me presidenten Osmani diskutuan “gjerë e gjatë” për situatën aktuale politike dhe aktgjykimin e fundit të Gjykatës Kushtetuese, që u shpall të enjten. “Afatet po rrjedhin. Në javën e fundit të korrikut duhet që ta kemi konstituimin e legjislaturës së re”, theksoi ai.

Kurti u shpreh se është i përkushtuar që përmes “bashkëpunimit, konsensusit dhe kompromisit” të arrihet konstituimi i Kuvendit, duke e parë atë si hapin e parë drejt formimit të qeverisë së re.

Sipas tij, në takim u përmendën të gjitha elementet përbërëse të procesit dhe progresi do të vlerësohet pas përfundimit të takimeve që Osmani do të zhvillojë edhe me liderët e partive të tjera politike. “Në fund do të mund të shohim se sa kemi bërë përparim dhe nëse ai është i mjaftueshëm”, tha Kurti.

Gjykata Kushtetuese vendosi ditë më parë që deputetët janë të detyruar të përfundojnë seancën konstituive brenda 30 ditëve nga certifikimi i rezultateve, afat që përfundon më 26 korrik.

Presidentja Osmani vijon konsultimet politike me përfaqësuesit e partive për të gjetur zgjidhje për ngërçin. Këshilltari i saj për media, Bekim Kupina, theksoi se “Presidentja pret që partitë të respektojnë aktgjykimin dhe të përmbushin detyrimin për konstituimin e Kuvendit brenda afatit të dhënë”.

LEXONI GJITHASHTU:

• Kush janë 4 të rinjtë që morën peng dhe dhunuan 48-vjeçarin në Durrës
• Dosja “Partizani”, Gjykata Kushtetuese konstaton shkelje