Mbi 80 palestinezë të vrarë në sulmet ajrore izraelite në Gaza

Të paktën 82 palestinezë, mes tyre fëmijë dhe persona që po mbushnin ujë, humbën jetën të dielën si pasojë e një vale sulmesh ajrore izraelite që goditën zona të banuara dhe tendat e të zhvendosurve në të gjithë Rripin e Gazës.

Në sulmet e fundit, gjashtë persona u vranë dhe dhjetëra të tjerë u plagosën në lagjet Zeitoun dhe Al-Tuffah të Qytetit të Gazës, sipas burimeve mjekësore lokale.

Pesë palestinezë të tjerë humbën jetën dhe 25 mbetën të plagosur në sulmet mbi tendat ku ishin strehuar të zhvendosurit në qytetin verior të Gazës dhe në qytetin jugor të Khan Younis.

Një tjetër sulm goditi një tubim civilësh në Qytetin e Gazës, duke lënë 11 viktima, përfshirë një fëmijë dhe një mjek, ndërsa mbi 50 persona u plagosën, sipas autoriteteve shëndetësore.

Në veri të Gazës, gjashtë persona u vranë pasi avionët luftarakë izraelitë bombarduan një shtëpi në kampin e refugjatëve Shati, ndërsa pesë të tjerë humbën jetën nga një tjetër sulm në Rrugën Hamid në perëndim të qytetit.

Në lagjen Al-Sabra, një vajzë e mitur dhe një person tjetër u vranë kur një shtëpi familjare pranë Xhamisë së Kompleksit Islam u godit nga bombardimet.

Autoritetet lokale njoftojnë se mes viktimave janë edhe 10 persona që po mblidhnin ujë. Situata mbetet kritike, ndërsa shërbimet shëndetësore në Gaza janë nën presion ekstrem për të trajtuar të plagosurit.

LEXONI GJITHASHTU:

• Gazetarja tregon detaje nga gjyqi për liderët e UÇK-së: Avokati i Thaçit optimist
• Vritet koloneli i shërbimit sekret ukrainas, ekzekutohet në një atentat në Kiev