Gazetarja Denada Jushi ka folur nga Haga në lidhje me procesin gjyqësor ndaj ish-liderëve të UÇK-së.

Ajo tha se ishte e pranishme në seancë, por se, sipas rregullave të gjykatës, nuk lejohej filmimi ose fotografimi i të pandehurve.

Jushi shpjegoi gjithashtu dhe deklaratat e avokatit të Thaçit pas seancës ku sipas saj ai ishte shumë optimist dhe deklaroi se prokuroria nuk ka prova të mjaftueshme për të dënuar ish-liderët e UÇK-së.

“Dje u mbyll procedura që prokuroria e ka pasur për këto dy vjet, pasi sot janë mbushur dy vjet nga fillimi i gjykimit të katër liderëve të UÇK-së, edhe pse ata janë mbajtur në paraburgim në Hagë për katër vjet e gjysmë. Në fund të kësaj seance, pala mbrojtëse e z. Thaçi, avokati i tij, z. Luka Misetiç, ka bërë një dalje për gazetarët. Avokati tha se është shumë optimist për përfundimin e këtij procesi, pasi, sipas tij, pas gjithë atyre që ka parë gjatë këtyre viteve, prokuroria nuk ka prova të mjaftueshme për të dënuar katër liderët e UÇK-së. Ai shtoi se ajo që prokuroria ka pretenduar në fillim të këtij procesi është shumë larg asaj që ka përfunduar sot”, tha gazetarja Denada Jushi.

Gazetarja njoftoi gjithashtu se prokuroria, para dy vitesh, kishte pretenduar se do të kishte 312 dëshmi, por në fakt janë marrë vetëm 125 dëshmi. Një pjesë e dëshmitarëve janë larguar dhe nuk kanë pranuar të flasin, ndërsa disa kanë dezertuar. Gjatë ditëve në vijim der më 15 prill, prokuroria ka afatin e fundit për të dorëzuar pretendimet e saj të shkruara në lidhje me katër liderët e ish-Ushtrisë Çlirimtare të Kosovës.

“Dita e djeshme ka qenë edhe dita e fundit kur duhej të paraqitej dëshmitari i fundit, por ai nuk ka ardhur, duke bërë që seanca të mbyllet”, tha Jushi.

LEXONI GJITHASHTU:

• Hashim Thaçi largohet nga EULEX-i, protestuesit brohorasin për lirimin e tij
• “Erdha i fundit babë!”, Hashim Thaçi lë mesazhin e ndjerë në varrin e babait të tij