Vijon “telenovela” e mandatit të “Shqipëria Bëhet”, Xhuveli kërkon rikthimin në garë

Mandati i vetëm i fituar nga koalicioni “Nisma Shqipëria Bëhet”, i përbërë nga forcat politike të Endri Shabanit dhe Adriatik Lapajt, vijon të jetë në qendër të përplasjeve.

Pas pretendimeve të Zeqir Kordhonit, kandidatit të listës së mbyllur dhe i afërm i Shabanit, në skenë hyn Kleana Xhuveli, e renditur e treta në të njëjtën listë dhe e përzgjedhur nga Lapaj.

Xhuveli i është drejtuar Komisionit Qendror të Zgjedhjeve (KQZ) me kërkesën për të revokuar dorëheqjen e saj nga kandidimi, duke argumentuar se vendimi është marrë pas një rishqyrtimi të kujdesshëm dhe konsultimesh me mbështetësit dhe strukturat politike.

Kjo lëvizje pritet të ndikojë në dinamikën e shpërndarjes së mandatit në Qarkun Tiranë, duke rritur paqartësitë në një proces tashmë të tensionuar.

Pakti mes dy partive brenda koalicionit është tronditur nga kthesat e Kordhonit, i cili kërkoi rivlerësimin e kandidaturës së tij, duke vënë në diskutim pritshmëritë e Lapajt për të marrë mandatin.

 Në reagim, Lapaj ka paralajmëruar se as Shabani, as Kordhoni nuk do të marrin mandatin.

Megjithatë, situata mbetet e paqartë, pasi në listën e mbyllur janë edhe emra të tjerë, përfshirë Ana Dajkon, e renditur e para dhe e përzgjedhur nga Lapaj, që mund të ndikojnë në rezultatin përfundimtar.

KQZ-ja pritet të marrë një vendim mbi këto kërkesa, duke përcaktuar fatin e mandatit të diskutuar në javët e ardhshme.

LEXONI GJITHASHTU: 

• Lëvizja e radhës e Lapajt, kërkesë KQZ: Mandati të shpërndahet sipas listës së hapur
• PD kërkoi pavlefshmërinë e zgjedhjeve në Tiranë, Kolegji Zgjedhor merr vendimin