Shpërthim në akademinë e sherifëve në Los Angeles, raportohet për 3 viktima

Të paktën tre persona janë vrarë pas një “incidenti të tmerrshëm” që ndodhi në një qendër trajnimi të Departamentit të Sherifit të Qarkut të Los Angeles, ka deklaruar Prokurorja e Përgjithshme e SHBA-së.

Një zëdhënës i departamentit tha se shpërthimi ndodhi në Qendrën e Trajnimit të Akademisë Biscailuz në lindje të Los Anxhelosit, rreth orës 7:30 të mëngjesit me orën lokale. Shkaku i shpërthimit është ende nën hetim.

Prokurorja e Përgjithshme Pam Bondi shkroi në platformën X: “Sapo fola me @USAttyEssayli për atë që duket të jetë një incident i tmerrshëm që vrau të paktën tre persona në një qendër trajnimi për zbatimin e ligjit në Los Angeles. Agjentët tanë federalë janë në vendngjarje dhe po punojmë për të mësuar më shumë.”

Pamjet ajrore të transmetuara nga KABC-TV tregojnë se shpërthimi ndodhi në një parking të mbushur me makina patrullimi dhe kamionë të sherifit. FBI dhe Byroja e Alkoolit, Duhanit, Armëve të Zjarrit dhe Eksplozivëve janë në terren për të mbështetur hetimet.

Kryetarja e bashkisë së Los Angeles, Karen Bass, tha se skuadra e bombave e LAPD-së gjithashtu ka reaguar në vendin e ngjarjes. Ajo shprehu solidaritet me të prekurit, duke thënë se “mendimet e të gjithë banorëve të Los Anxhelosit janë me të gjithë ata që u prekën nga ky shpërthim”.

Guvernatori i Kalifornisë, Gavin Newsom, është informuar për situatën. Zyra e tij njoftoi se Shërbimet e Emergjencave të Guvernatorit janë në kontakt me Departamentin e Sherifit dhe po monitorojnë nga afër zhvillimet, duke ofruar ndihmën e plotë të shtetit.

LEXONI GJITHASHTU:

• Trump kërkon transparencë për dosjen Epstein, publikimi i dëshmive me vendim gjykate
• Trump kërcënon Rusinë me tarifa shumë të ashpra