Zjarri në Delvinë, Ministria e Mbrojtjes urdhëron evakuimin e tre fshatrave

Situata e zjarreve në Bashkinë e Delvinës vijon të jetë kritike, ndërsa flakët kanë përfshirë një sipërfaqe të gjerë dhe kanë shkaktuar dëme të konsiderueshme materiale, kryesisht në Senicë, ku është djegur një kishë e njohur.

Ministria e Mbrojtjes, përmes strukturave të Mbrojtjes Civile, ka urdhëruar evakuimin e menjëhershëm të banorëve në fshatrat Palavli, Vergo dhe Kopaçëz, për shkak të rrezikut të përhapjes së zjarrit dhe kërcënimit të jetës dhe pronës së qytetarëve.

Deri më tani, zjarri ka shkrumbuar 11 banesa, ndërsa forcat zjarrfikëse dhe strukturat e emergjencës janë në terren për të menaxhuar situatën.

Ministria i bën thirrje banorëve të ndjekin udhëzimet e emergjencave civile dhe të bashkëpunojnë me forcat e Policisë dhe autoritetet vendore, të cilat po punojnë për evakuimin dhe sigurimin e zonës.