Portieri i Liverpoolit shënon gol dhe mban gjallë shpresat për një vend në Champions League

Portieri i Liverpoolit, Alisson Becker, realizoi golin e fitores 2-1 ndaj West Bromwich Albion të dielën.

Shtatlarti i portës shënoi me një goditje me kokë në minutën e 95-të duke i mbajtur gjallë të kuqve të Jurgen Klopp shpresat për ngjitjen në vendin e katërt të renditjes, vend që siguron kualifikimin për në Champions League sezonin e ardhshëm.

Alisson u bë portieri i gjashtë në historinë e kampionatit anglez që shënon gol – i pari, për Liverpoolin dhe që shënon me goditje me kokë.

Braziliani ia kushtoi golin babait të tij, Jose Agustinho Becker, i cili u nda tragjikisht nga jeta në muajin shkurt.

“Jam tejet i emocionuar, këto muajt e fundit me gjithçka ndodhur me mua dhe familjen, por futbolli është jeta ime, luaj që kur kam qenë i vogël me babain tim, do të doja shumë që ai të kishte qenë këtu dhe ta shikonte golin, por jam i sigurt se është duke festuar njësoj si unë atje lart,” – tha Becker për mediat pas golit.

Liverpool pas kësaj ndeshjeje shkon në kuotën e 63 pikëve dhe shkurton më tej distancën me Chelsea-in (63 pikë).

Blutë e Londrës luajnë ndeshjen e ardhshme kundër Leciester City-it. Të ashtuquajturit “Dhelprat” fituan pikërisht ndaj Chelsea-it në fundjavë kupën e federatës dhe kërkojnë medoemos të mbajnë vendin e tretë (66 pikë).

Cilido qoftë rezultati i kësaj ndeshjeje, Liverpooli ka në dorë vetë kualifikimin në Champions League, mjafton të fitojë takimet e fundit ndaj Burnley dhe Crystal Palace.