Durrës| Vidhte kabujt elektrikë duke lënë qytetin pa drita, arrestohet 35-vjeçari

Policia e Durrësit ka vënë në pranga shtetasin Amaraldo Vezi, 35 vjeç, në kuadër të operacionit policor të koduar “Light”, për vjedhjen e kabujve elektrikë të ndriçimit rrugor në disa zona të qytetit.

Hetimet e kryera nga shërbimet e Komisariatit të Policisë Durrës, në bashkëpunim me qytetarët, çuan në identifikimin dhe arrestimin e Vezit, i cili dyshohet për një seri vjedhjesh që kanë shkaktuar ndërprerje të ndriçimit në segmente të ndryshme rrugore.

Sipas të dhënave zyrtare, vjedhjet janë kryer zona të ndryshme brenda juridiksionit të Drejtorisë Vendore të Policisë Durrës, dhe autoritetet vijojnë hetimet për të dokumentuar të gjitha rastet në të cilat mund të jetë i përfshirë shtetasi në fjalë.

Materialet procedurale janë referuar Prokurorisë së Durrësit, për veprime të mëtejshme ligjore.