Liban: Qeveria ngarkon ushtrinë me plan për çarmatosjen e Hezbollahut

Qeveria e Libanit ka urdhëruar ushtrinë të hartojë një plan për të siguruar që vetëm institucionet shtetërore të posedojnë armë deri në fund të vitit, në një përpjekje për të çarmatosur grupin militant Hezbollah, i mbështetur nga Irani.

Njoftimi erdhi nga kryeministri Nawaf Salam pas një mbledhjeje gati gjashtë orëshe të kabinetit qeveritar.

Ai bëri të ditur se plani duhet të përgatitet brenda këtij muaji për diskutim dhe miratim. Pas takimit, Salam theksoi “detyrën e shtetit për të monopolizuar posedimin e armëve”, sipas raportimit të Agjencisë Kombëtare të Lajmeve (NNA) në Liban.

Ky vendim vjen pas presionit të fortë të Shteteve të Bashkuara ndaj Bejrutit, përfshirë edhe vizitën e dërguarit amerikan Tom Barrack në korrik, i cili kërkoi një qasje më vendimtare ndaj çarmatosjes së Hezbollahut.

Megjithatë, ndërkohë që qeveria po diskutohej, udhëheqësi i Hezbollahut, Naim Kassem, hodhi poshtë thirrjet për dorëzimin e armëve të grupit.

Në një fjalim televiziv, ai deklaroi se “çdo afat për zbatimin e këtij plani nën agresionin izraelit është i papranueshëm”.

Hezbollahu doli i dobësuar nga një konflikt 14-mujor me Izraelin, i cili përfundoi në nëntor me armëpushim të ndërmjetësuar nga SHBA. Gjatë luftës, disa udhëheqës të grupit u vranë, mijëra luftëtarë u eliminuan dhe shumica e armatimeve të tij u shkatërruan.

LEXONI GJITHASHTU: 

• Izraeli synon marrëdhënie diplomatike me Sirinë dhe Libanin
• Banka Botërore miraton 250 milionë dollarë për Libanin të goditur nga lufta