Afrim Krasniqi “gjen gabimet” e PD-së: S’kishte risi në kandidatë dhe nuk krijoi frymë

Drejtuesi i Institutit për Studimet Politike, Afrim Krasniqi analizoi mangësitë elektorale, të cilat sipas tij çuan në humbjen e Partisë Demokratike në zgjedhje.

Gjatë diskutimit në studion e “Ilva Now”, z. Krasniqi tha se programi i selisë në zgjedhje ishte “më shumë dëshirë se sa mundësi reale”

“Çfarë e bën një parti konkurruese? E bën programi, stafi dhe aftësia për një fushatë, që është atraktive për votuesit e pavendosur dhe votuesit e rinj. Programi i PD ishte më shumë i dëshirës së mirë dhe jo i aftësive reale në një Shqipëri kaq të varfër dhe me një Shqipëri me shumë probleme”, tha ai.

Një tjetër problematikë sipas Afrim Krasniqit është fakti se PD-ja nuk prodhoi risi në emra kandidatësh në zgjedhjet e 25 prillit.

“Së dyti, nuk pati asnjë risi tek kandidatët. Më shumë risi pati në 2017. Nuk pati asnjë emër publik dhe prurje të re, pavarësisht se u nis një proces i selektimi të brendshëm. Nuk pati ekip elektoral, nuk e dinim se cilët do të ishim ministra. Nuk arrit të krijojë një frymë besimi”, tha Afrim Krasniqi.