Policia e Vlorës shpëton dy turistë gjermanë, të bllokuar në grykëderdhjen e Semanit

Dy turistë gjermanë janë shpëtuar nga Policia e Vlorës, pasi veliera e tyre kishte mbetur e bllokuar që prej mbrëmjes së djeshme në grykëderdhjen e lumit Seman.

Sipas njoftimit zyrtar nga Policia e Vlorës, salla operative mori njoftim se një velierë me flamur gjerman, në bord të së cilës ndodheshin dy shtetas, kishte mbetur e bllokuar në grykëderdhjen e lumit Seman dhe kërkohej ndihmë.

Nga verifikimet paraprake rezulton se veliera ishte nisur nga Korfuzi, Greqi, dhe për shkak të kushteve të terrenit, kishte mbetur e bllokuar në zonë që prej mbrëmjes së kaluar.

“Të dy shtetasit ndodhen në gjendje të mirë shëndetësore dhe do të asistohen nga Kapiteneria e Portit Vlorë për veprime të mëtejshme.” -thuhet në njoftimin e policisë.

LEXONI GJITHASHTU: 

• Policia Vlorës ndjek penalisht drejtorin e kompanisë që kryen punime në port
• Policia e Vlorës: 68-vjeçari që u gjet i vdekur ishte vetëm me qenin në banesë