Tarifat 50% të Trump ndaj Indisë hyjnë në fuqi, Modi reagon me ulje taksash

Tarifat e reja prej 50% të vendosura nga presidenti amerikan Donald Trump ndaj Indisë kanë hyrë në fuqi, disa javë pas urdhrit ekzekutiv që vendosi gjithashtu një gjobë shtesë prej 25% për blerjet e Indisë nga Rusia, përfshirë naftën dhe armët.

Kjo e rendit Indinë mes vendeve me tarifat më të larta në botë dhe rrezikon të godasë rëndë ekonominë e pestë më të madhe në botë, sidomos sektorët e eksportit që furnizojnë tregun amerikan me produkte si rroba, diamante dhe ushqime deti.

Deri vonë, SHBA ishte partneri më i madh tregtar i Indisë ndërsa përballë këtyre zhvillimeve, qeveria indiane ka nisur të marrë masa për zbutjen e ndikimit ekonomik.

Kryeministri Narendra Modi ka paralajmëruar një “dhuratë të Diwalit” në formën e një pakete të re fiskale që përfshin ulje të mëtejshme taksash dhe reforma në sistemin tatimor.

Gjatë fjalimit për Ditën e Pavarësisë, ai bëri thirrje për vetëbesim ekonomik dhe përkrahje të prodhimit vendas, duke u kërkuar qytetarëve të vendosin tabela “Made in India” jashtë bizneseve të tyre.

Një ndër lëvizjet më të mëdha të paralajmëruara nga qeveria është rishikimi i sistemit të taksës mbi mallrat dhe shërbimet (GST).

Ministria e Financave ka paraqitur një propozim për thjeshtimin e sistemit në dy nivele, për të ulur kompleksitetin dhe për të nxitur konsumin.

Kjo masë, e kombinuar me uljen e tatimit mbi të ardhurat e planifikuar për prillin e vitit 2025, pritet të japë një nxitje të ndjeshme për konsumin, që përbën rreth 60% të PBB-së së Indisë.

Sipas vlerësimeve të analistëve nga Jeffries dhe Morgan Stanley, paketa e re fiskale pritet të ndihmojë në përballimin e sfidave të krijuara nga rënia e kërkesës së jashtme dhe tarifat e reja, duke ndikuar pozitivisht në rritjen ekonomike dhe uljen e inflacionit.

Në fokus të përfitimeve nga këto masa do të jenë sektorët e konsumit, si prodhimi i automjeteve të vogla, tekstileve, çimentos dhe mallrave të tjera që konsumohen gjerësisht në tregun vendas.

Sipas UBS, ulja e GST-së pritet të ketë efekt më të madh në nxitjen e konsumit sesa uljet e mëparshme të taksave për korporatat, pasi ndikon drejtpërdrejt në çmimin e blerjes për konsumatorin.

LEXONI GJITHASHTU: 

• Trump mesazh Kinës: Duhet të na japin magnete, ndryshe do vendosim tarifa 200%
• Kanadaja do të heqë shumë nga tarifat hakmarrëse ndaj SHBA-së