Caktohet ushtruesi i detyrës së ministrit të Drejtësisë në Kosovë

Qeveria në detyrë e Kosovës njoftoi sot se Blerim Sallahu është caktuar në postin e ushtruesit të detyrës së ministrit të Drejtësisë.

Sallahu, i cili deri më tani ka shërbyer si zëvendësministër në këtë dikaster, merr drejtimin pas zgjedhjes së ministres në detyrë të Drejtësisë, Albulena Haxhiu, në postin e nënkryetares së Kuvendit të Kosovës.

“Kryeministri në detyrë i Kosovës, Albin Kurti, e uron zotin Sallahu për përgjegjësinë e re dhe i dëshiron suksese në përmbushjen e detyrave”, thuhet në njoftimin e ekzekutivit kosovar.

Një ditë më parë, Kuvendi i Kosovës bëri hapin e parë drejt konstituimit duke zgjedhur kryetar të ri, Dimal Bashën nga Lëvizja Vetëvendosje. Pas kësaj, në pozitat e nënkryetarëve u zgjodhën Albulena Haxhiu (VV), Vlora Çitaku (PDK), Kujtim Shala (LDK) dhe Emilija Rexhepi (komuniteti boshnjak).

Procesi i konstituimit ende nuk është përmbyllur, pasi pritet zgjedhja e nënkryetarit nga komuniteti serb. Vetëm pas këtij hapi do të hapet rruga për formimin e Qeverisë së re të Kosovës.

LEXONI GJITHASHTU:

• Dimal Basha zgjidhet kryetari i ri i Kuvendit të Kosovës
• Zgjidhet ngërçi politik, kush është kryeparlamentari i ri i Kosovës