Po shpërndanin doza droge në Tiranë, vihen në pranga dy persona

Policia e Tiranës ka goditur një tjetër rast të shpërndarjes së lëndëve narkotike në kryeqytet. Dy persona janë kapur në flagrancë nga Komisariati Nr. 3, në rrugën “Mahmut Bobrati”, ndërsa po shpërndanin doza droge.

Në pranga kanë rënë shtetasit E. F., 43 vjeç dhe I. K., 37 vjeç, të dy banues në Tiranë, të cilët bashkëpunonin për shpërndarjen e kokainës dhe kanabisit në zona të ndryshme të qytetit.

Gjatë kontrollit, shërbimet e policisë u gjetën dhe sekuestruan në cilësinë e provës materiale:

• Doza të lëndëve narkotike kokainë dhe kanabis
• 2 thika (mjete prerëse)
• 2 pistoleta sportive

Sipas hetimeve paraprake, dyshohet se lënda narkotike ndahej në doza në një ambient të përdorur nga shtetasi E. F., për t’u shpërndarë më pas në rrugët e Tiranës.

Policia vijon punën për dokumentimin e plotë të veprimtarisë kriminale dhe identifikimin e bashkëpunëtorëve të tjerë të mundshëm.