Liverpool perfekt në nisje, mposht edhe rivalët për titull

Liverpool mund të konsiderohet që tani pretendenti kryesor për titullin në Angli, me lojë bindëse dhe rezultate, ku në 3 ndeshjet e para numëron vetëm fitore, i vetmi në ligë. Skuadra e udhëhequr nga Arne Slot konfirmoi veten edhe ndaj një rivali direkt siç është Arsenal, skuadër që e mposhti në shifrat 1-0 pas supergolit të Dominic Szoboszlai. Një ndeshje e luftuar nga të dyja ekipet, me pjesën e parë që u mbyll me rrjeta të paprekura.

Rastet për shënim ishin të pakta, e u duk se ndeshja do të mbyllej me shifra të bardha. Kjo gjë nuk ndodhi pasi 7 minuta nga fundi, mesfushori hungarez Szoboszlai ekzekutoi në mënyrë perfekte një goditje dënimi duke ndalur topin në trekëndëshin e Rayas. 1-0 dhe Liverpool rrëmben fitoren e tretë në po aq javë. Mbrojtja e titullit duket se është në rrugën e duhur, pasi në javën e parë mposhtën Bournemouth, në të dytën Newcastle dhe tani në javën e tretë Arsenalin, skuadra që u paraqitën mirë vitin që lamë pas.

Asnjë skuadër deri më tani në Angli nuk ka bërë kaq mirë, Chelsea renditet i dyti me 7 pikë, ndërsa gjithë ekipet që vijnë më pas kanë regjistruar të paktën një humbje.