Portugali: Tramvaji doli nga shinat, Prokuroria nis hetimet për aksidentin tragjik

Zyra e prokurorit publik të Portugalisë ka hapur një hetim zyrtar lidhur me aksidentin tragjik që ndodhi dje në qendër të Lisbonës, ku një tramvaj historik i linjës Gloria doli nga shinat dhe u shkatërrua pothuajse tërësisht.

Lajmi u konfirmua nga agjencia kombëtare e lajmeve Lusa, e cila raportoi se zyra e prokurorit të përgjithshëm deklaroi: “Siç është zakon në këto lloj situatash dhe siç kërkohet me ligj, zyra e prokurorit publik do të hapë një hetim.”

Sipas deklaratës zyrtare, organi i akuzës është duke ndërmarrë të gjitha procedurat e nevojshme brenda fushëveprimit të kompetencave të saj, “veçanërisht me qëllim ruajtjen e provave, me udhëzime dhe në koordinim me agjencitë policore.”

Hetimet janë duke u kryer gjithashtu nga policia portugeze, autoriteti kombëtar i sigurisë së transportit dhe kompania që administron linjën e funikularit Gloria.

Pamjet nga vendngjarja tregojnë shkatërrimin e madh të shkaktuar nga aksidenti, ndërsa shërbimet e emergjencës mbërritën brenda pak minutash dhe punuan intensivisht për të shpëtuar të bllokuarit.

Deri më tani, autoritetet kanë konfirmuar të paktën 15 viktima. Ekipet e zjarrfikësve dhe të emergjencës kanë punuar për orë të tëra për të nxjerrë personat e mbetur brenda vagonit të rrëzuar.

Ndërkohë, vijojnë përpjekjet për identifikimin e viktimave dhe përcaktimin e saktë të shkakut të aksidentit.

LEXONI GJITHASHTU:

• Aksidenti në Lisbonë me 15 viktima: Kryeministri portugez shpall ditë zie
• Kim premton mbështetje të plotë për luftën e Rusisë kundër Ukrainës