Një incident ka tensionuar edhe më tej kufijtë lindorë të NATO-s, pasi tetë dronë rusë kanë shkelur hapësirën ajrore të Polonisë gjatë një sulmi ajror në Ukrainën Perëndimore.
Lidhur me këtë ka reaguar dhe Ambasadori i SHBA-së në NATO, ku përmes një postimi në rrjetin social X, ai shprehu mbështetjen ndaj aleatëve të NATO-s, duke theksuar: “Qëndrojmë pranë Aleatëve tanë në @NATO përballë këtyre shkeljeve të hapësirës ajrore dhe do të mbrojmë çdo pëllëmbë të territorit të NATO-s”.
Më tej, në postim, ambasadori është ndalur në detaje duke shtuar:
“Komanda operacionale e Polonisë njoftoi herët këtë mëngjes në X se forcat e saj dhe të tjera ishin në gatishmëri pas shkeljes së hapësirës së saj ajrore.
Disa orë më vonë ata publikuan se forcat e alarmuara u kthyen në nivelet standarde të gatishmërisë. Ata gjithashtu falënderuan Komandën Ajrore të NATO-s (AIRCOM) dhe forcat ajrore të Holandës, avionët luftarakë të së cilës u përgjigjën dhe u përballën me kërcënimet e mundshme ndaj territorit të Aleancës.
Kjo është hera e parë që avionët e NATO-s janë përfshirë kundër kërcënimeve të mundshme në hapësirën ajrore të Aleancës.
Holanda dhe Polonia nuk ishin, megjithatë, të vetmet vende që reaguan. Patriotët gjermanë në Poloni u vendosën në gatishmëri, dhe një avion italian për paralajmërim të hershëm ajror si dhe një avion furnizues ajror nga flota e avionëve shumëfunksionalë të NATO-s për transport dhe furnizim në ajër (MRTT) u ngritën në fluturim.
NATO, Shtabi i Lartë i Forcave Aleate në Evropë dhe e gjithë Komanda Aleate e Operacioneve janë të përkushtuara për të mbrojtur çdo kilometër të territorit të NATO-s, përfshirë edhe hapësirën tonë ajrore.”**
Kol. Martin L. O’Donnell, zëdhënës i Shtabit të Lartë të Forcave Aleate në Evropë”.
