Vijon gjyqi për Sarkozy, ish-presidenti francez akuzohet për financim të paligjshëm të fushatës

Ka vijuar këtë të enjte gjyqi për ish-presidentin e Francës, Nicolas Sarkozy, i cili akuzohet për financim të paligjshëm të fushatës së tij të vitit 2012. Gjyqi u shty në ditën e tij të hapjes në muajin mars, pasi një avokat u infektua me COVID-19.

Prokurorët pretendojnë se partia konservatore e z. Sarkozy shpenzoi thuajse dyfishin e shumës së lejuar nga ligji elektoral francez prej 22.5 milionë eurosh, për një fushatë ekstravagante, koston e vërtetë të së cilës e fshehu përmes një agjencie të marrëdhënieve me publikun.

Nicolas Sarkozy nuk ishte i pranishëm në seancën e së enjtes, ndërsa ky gjyq hedh më shumë hije mbi karrierën e tij. Më herët gjatë vitit, ish-presidenti u dënua për korrupsion në një çështje tjetër.