Berisha “no grata” nga SHBA, reagon për herë të parë presidenti Meta

Presidenti Ilir Meta reagoi për herë të parë pas vendimit të DASH për të shpallur non grata ish-kryeministrin Sali Berisha dhe familjen e tij.

Kreu i shtetit e cilëson vendimin e DASH “fletërrufe e porositur nga regjimi i kleptokracisë në Tiranë kundër z. Sali Berisha, Presidentit të parë demokratik të vendit”.

Sipas z. Meta, vendimi i marrë në këtë moment lidhet me përpjekjet për të penguar hetimin e parregullsive të konstatuara gjatë procesit zgjedhor të 25 prillit.

“Kjo ‘fletërrufe’ jo rastësisht u kërkua në këtë moment, kur procesi zgjedhor ende nuk është mbyllur zyrtarisht dhe kur institucionet, sipas Kodit Zgjedhor, duhet të shprehen lidhur me ankesat e shumta për manipulimet dhe krimet zgjedhore të denoncuara gjerësisht, që kanë cenuar rëndë standardet perëndimore të një procesi elektoral plotësisht të lirë, të ndershëm dhe demokratik”, shkruan përmes një postimi në Facebook kreu i shtetit.

Teksa u bën thirrje institucioneve në Shqipëri që gjithëve të zbatojnë me rigorozitet ligjin, si dhe të gjitha kërkesat e Kodit Zgjedhor lidhur me procesin e 25 prillit, që sipas tij është çështja më e rëndësishme aktualisht, z. Meta publikoi edhe mesazhin e solidaritetit, që i kishte dërguar ish-kryeministrit Berisha dhe familjes së tij.

“Përshëndetjet e mia më të sinqerta dhe solidaritet për Ju, Lilin dhe Familjen tuaj pas këtij akti të shëmtuar, të pabesë dhe të poshtër, që ka të bëjë vetëm me lobingjet antishqiptare dhe asgjë tjetër. Ata që financuan për të shpallur hero të Reformës në Drejtësi Dvoranin e Partisë mund të bënin çdo marrëzi dhe nuk mund të na habisin më me pacipësinë e tyre për respektin ndaj shtetit të së drejtës dhe pavarësinë e Drejtësisë”, i shkruan kreu i shtetit ish-kryeministrit Berisha, në mesazhin e bërë publik në faqen e tij zyrtare në Facebook.