Kryebashkiakja Emiriana Sako: Kemi marrë të gjitha për nisjen e sezonit turistik në Durrës

Kryetarja e bashkisë së Durrësit, Emiriana Sako tha për Euronews Albania se nga ana e bashkisë janë marrë masat për nisjen e sezonit turistik, duke nisur me pastrimin dhe plugimin e vijës bregdetare për të vijuar me dezinfektimin, një proces që kryhet çdo vit dhe shërben për të pasur një plazh më të pastër në zonën e rërës.

Znj. Sako tha se ndërmarrjet e bashkisë kanë nisur një bashkëpunim me universitetet dhe gjimnazet për të ndërgjegjësuar qytetarët që të mbrojnë mjedisin dhe hapësirat ku shpenzojnë kohën.

“Bashkë me këtë iniciativë kemi ndërmarrë edhe pastrimin e monumenteve të kulturës që gjenden pranë plazhit si Porto Romano dhe Ishëm”, tha znj.Sako.

E pyetur nëse edhe subjektet private po bëjnë të njëjtën gjë lidhur me pastrimin e plazheve, znj. Sako u shpreh se nga ana e bashkisë ende nuk ka nisur shpërndarja e ambienteve. Ajo sqaroi se subjektet duhet të aplikojnë në e-Albania e më tej të lidhin një kontratë me bashkinë ku përfshihet edhe pastrimi i këtyre hapësirave.