“Titaniku: Një Udhëtim Zhytës” – Ekspozita që sjell historinë më tragjike të detit

113 vjet pas fundosjes së Titanikut, interesi për anijen më famëkeqe të shekullit XX nuk ka rënë, përkundrazi, ai vazhdon të rritet. Ekspozita më e re me titullin “Titaniku: Një Udhëtim Zhytës” i ofron vizitorëve një përvojë unike që ndërthur historinë me teknologjinë moderne, për të rikrijuar një nga tragjeditë më të mëdha detare.

E ndarë në disa ambiente tematike, ekspozita i udhëheq vizitorët përmes rrugëtimit të plotë të Titanikut që nga ndërtimi në vitin 1909 në Belfast, deri te fundosja tragjike më 14 prill 1912 në Oqeanin Atlantik.

Në hapësira të rindërtuara me përpikëri, mund të shihen objekte origjinale nga anija e Titanikut dhe dy anijet e tjera si Britanniku dhe Olympic, dhoma me pajisje autentike, dokumente të rralla, dhe skena të njohura nga filmi legjendar i James Cameron.

Në ekspozitë konkretisht paraqiten: Rindërtimet në përmasa reale të ambienteve të Titanikut, si shkallët madhështore dhe restoranti i klasit të parë.

Një simulim 360° i momenteve të mbytjes, ku vizitorët ndihen sikur ndodhen brenda një varke shpëtimi.

Objekte autentike të nxjerra nga deti ose të shpëtuara nga të mbijetuarit.

Një përvojë me realitetin virtual VR që i lejon vizitorët të eksplorojnë Titanikun nga çdo këndvështrim, përfshirë edhe rrënojat në fund të oqeanit.

Ajsbergu që është dhe fundi i udhëtimit historik është po ashtu pjesë e ekspozitës, së bashku me një analizë të detajuar të shkaqeve të katastrofës: nga gabimet njerëzore, te mungesa e dylbive, e deri te shpejtësia e tepërt e anijes.

Ekspozita është rezultat i një pune të kujdesshme nga ekspertë ndërkombëtarë dhe koleksionistë që kanë sjellë në jetë më shumë se 300 objekte historike dhe një përvojë muzeale që nuk lë askënd indiferent.

LEXONI GJITHASHTU:

• Ekspedita në fund të Atlantikut, kamerat zbuluan si po shkatërrohet ngadal Titaniku
• Ora e xhepit e pasagjerit më të pasur të Titanikut, u shit për 1.4 milionë €