Falsifikime në emër të Salvador Dali-t, policia italiane sekuestron 21 vepra arti

Skuadra italiane e policisë për krimet ndaj artit sekuestroi të martën 21 vepra arti nga një ekspozitë e madhe në Parma, me dyshimin se ato i ishin atribuar gabimisht surrealistit spanjoll, Salvador Dali.

Ekspozita, e titulluar “Dali, Midis Artit dhe Mitit”, kishte qenë e hapur vetëm për disa ditë në Palazzo Tarasconi, përpara se policia të konfiskonte veprat e dyshuara si të falsifikuara, duke përfshirë vizatime, tapiceri dhe gravura.

Dyshimet mbi autenticitetin e tyre dolën në janar, kur oficerë nga njësia e Romës e skuadrës së artit të Karabinierëve kryen një kontroll rutinë të ekspozitës, ndërsa ajo u prit në Museo Storico della Fanteria.

“Gjatë inspektimit, të llojit që bëjmë zakonisht në muze, diçka dukej se nuk shkonte,” tha për Guardian Diego Poglio, oficeri i lartë që drejtonte hetimin.

“Vumë re se vetëm litografi, postera dhe vizatime nga Dali ishin në ekspozitë, së bashku me disa statuja dhe objekte të tjera, por asnjë pikturë apo ndonjë gjë tjetër me rëndësi. Ishte e vështirë të kuptohej pse dikush do të donte të organizonte një ekspozitë me vepra kaq me vlerë të ulët.”

Skuadra i ngriti dyshimet e saj te Fondacioni Gala-Salvador Dali, me seli në Figueres, Katalonjë, i cili zbuloi se nuk ishte kontaktuar kurrë në lidhje me ekspozitën nga organizatorët e saj.

Poglio tha: “E gjetëm këtë absolutisht të çuditshme, sepse nëse doni të organizoni një ekspozitë të veprave të një artisti, veçanërisht një ekspozitë kaq të rëndësishme, nuk mund të mos kontaktoni fondacionin që menaxhon koleksionin.”

Policia i dërgoi fondacionit fotografi të veprave të artit që dyshohej se i ishin atribuar në mënyrë të rreme Dali-t, i cili vdiq në vitin 1989. Fondacioni pranoi se “diçka nuk shkonte” dhe dërgoi një ekip ekspertësh në Romë.

“Ata dyshuan gjithashtu për paqartësi dhe për këtë arsye prokurorët e Romës dhanë urdhër që 21 veprat të sekuestroheshin,” tha Poglio. “Tani do të vazhdojmë me hetimet e nevojshme teknike dhe shkencore për të përcaktuar nëse veprat janë autentike apo jo.”

Poglio theksoi se hetimi ishte në fazën e tij paraprake dhe askush nuk dyshohej ende për shkelje.

Policia italiane e artit merret rregullisht me rastet e shitjes ose ekspozimit të veprave të riprodhuara nga artistë të famshëm të botës.

“Po shohim një prani të konsiderueshme të veprave të falsifikuara në treg, veçanërisht në artin bashkëkohor,” tha Poglio. “Është një fenomen global.”

Në shkurt, policia në Romë zbuloi një punishte klandestine ku prodhoheshin piktura të falsifikuara nga Pablo Picasso dhe Rembrandt, përpara se të shiteshin në internet.

Zbulimi erdhi disa muaj pasi policia italiane shkatërroi një rrjet falsifikues në të gjithë Evropën, i dyshuar për prodhimin e kopjeve të veprave të artistëve, përfshirë Banksy, Picasso, Andy Warhol dhe Gustav Klimt.

Shpesh falsifikimet dalin në dritë vetëm kur ekspozohen në muze të shquara.

“Shumë prej atyre që qëndrojnë pas ekspozitave veprojnë me mirëbesim,” tha Poglio.

“Megjithatë, duhet të jemi gjithmonë të kujdesshëm — ata që janë përgjegjës për kurimin shkencor duhet të kryejnë gjithmonë kontrolle të hollësishme mbi autenticitetin përpara se të shfaqin veprat.”

LEXONI GJITHASHTU:

• Çmontohet rrjeti i falsifikuesve, operacion në 4 vende, sekuestrohen 2100 vepra arti
• Kryevepra e Verdit rikthehet në Tiranë, nën regjinë e mjeshtrit botëror Hugo de Ana