Fushë-Krujë, zbulohet një automjet i djegur me dy armë zjarri brenda

Një automjet i djegur është gjetur mbrëmjen e kësaj të shtune në Fushë-Krujë. Në automjet janë janë gjetur dy armë zjarri automatike dhe një krehër. Makina është gjetur pranë një impianti për përpunimin e inerteve në zonën e Tapizës, në Fushë-Krujë.

Sipas njoftimit zyrtar nga Policia e Tiranës, ngjarja është konstatuar rreth orës 21:30 të datës 3 tetor. Mjeti i djegur ishte tip “Peugeot” dhe është gjetur i shkrumbuar plotësisht në një zonë periferike.

“Rreth orës 21:30, në afërsi të një impianti për përpunimin e inerteve, në Tapizë, është djegur plotësisht një automjet tip ‘Peugeot’. Gjatë këqyrjes, në brendësi të tij janë gjetur dy armë zjarri automatike dhe një krehër. Punohet për identifikimin dhe kapjen e autorëve, si dhe për sqarimin e rrethanave të rastit,” thuhet në deklaratën e policisë.

Grupi hetimor ndodhet në vendngjarje dhe po punon për zbardhjen e plotë të rrethanave. Hetuesit po verifikojnë nëse armët dhe automjeti i djegur mund të jenë përdorur në ndonjë ngjarje kriminale.

Ende nuk ka të dhëna për autorët apo ndonjë lidhje të mundshme të mjetit me episode të mëparshme kriminale në zonë.