Dhjetëra familje klandestinësh të bllokuar në kufirin e Bosnjës dhe Kroacisë

Dhjetëra familje klandestinësh me fëmijë të vegjël janë duke fjetur në një fshat pranë kufirit të Bosnjës me Kroacinë, ndërsa kërkojnë një shans për të kaluar dhe për të lëvizur drejt Evropës Perëndimore.

Njerëzit që ikin nga lufta dhe varfëria në vendet e tyre në Lindjen e Mesme, Afrikë ose Azi po qëndrojnë në çadra të vogla dhe shtëpi të braktisura, pa ujë të rrjedhshëm dhe energji elektrike.

Fshati, Bosanska Bojna, ishte zbrazur gjatë luftës 1992-1995 në Bosnjë.

Disa prej tyre thanë se kanë njerëz të sëmurë, por asnjë mjek nuk ndodhet në shërbim të tyre.

“Situata këtu nuk është normale, nuk është e mirë. Disa njerëz janë të sëmurë, ”tha Safirahmad Malikzadeh, i cili është nga Afganistani.

“Ne nuk kemi ndonjë tualet dhe ujë për të pirë”, shtoi ai.

Autoritetet boshnjake duan që refugjatët të qëndrojnë në kampe të azilkërkuesve dhe kanë ndaluar shpërndarjen e ndihmës humanitare në vendbanimet e improvizuara.

Ka mijëra qytetarë të bllokuar aktualisht në Bosnjë, kryesisht në kampe zyrtare.

Ata mbërritën në Bosnjë duke shpresuar të kalonin në Kroaci, një vend i Bashkimit Evropian dhe nga atje të udhëtonin për në vendet më të pasura të BE-së.