Shfaqja “Rendi i ri” sjell dramën bashkëkohore në skenën e Gjirokastrës

Shfaqja “Rendi i ri” e dramaturgut spanjoll Sergi Pompermayer ka çelur sezonin e ri teatror në skenën artistike, në qytetin e Gjirokastrës. E intepretuar për artdashësit nga aktorët e teatrit shëtitës “Çajupi” kjo pjesë trajton problematikat me të cilat përballet shoqëria bashkëkohore.

Ngjarja zhvillohet në një repart të braktisur autopsie dhe ka në qendër katër rrëmbyes e dy të rrëmbyera (nënë e bijë), që instinktivisht janë nën kthetrat e urrejtjes dhe grindjeve të vazhdueshme për vendin, pasiguri me trazira, me krizë demokracie, vënie në pikëpyetje të drejtësisë, abuzimin emocional, kompeksitetin e pakënaqësisë dhe anarkinë.

 “Që në momentin e parë që e morëm mendojmë se kjo pjesë është shumë aktuale  për një popull i cili  vuan gjithçka sidomos papunësinë, legalizimet e pronave, ishte shumë aktuale dhe ishte shumë afër nesh,afër  realitetit tonë dhe pse kjo pjesë është bërë në realitetin e Spanjës në 2014 por është shumë aktuale për ne , dhe ishte shumë e lehtë për tu perceptuar dhe shumë e qartë që ne të bëheshim zëri  i këtyre njerëzve dhe  vetes sonë në radhë të parë  dhe i gjithë njerëzve që përfaqësojnë këtë lloj shoqërie” –shprehet Era Çaushi aktore.

 “Sollëm në skenë një shfaqje që për mua do të ngelet gjatë në kujtesë ishte një  tekst dramaturgjik shumë i bukur,  kemi bërë një punë shumë të bukur, ka qenë  një trup që punoi me shpirt  sepse kjo është një nga ato pjesë që mendoj unë  çdo aktor duhet të lejë një copë të shpirtit sepse përjetimet emocionale që kalon aktori janë shumë  të vështira dhe ndihem i lumtur që premiera ishte në qytetin e Gjirokastrës”- shprehet Aleksandër Kondi, aktor.

 “Teatri shëtitës është vazhdimisht bujtës  në Gjirokastër dhe  ndihet shumë mirë  vendosi që ta filloj këtë udhëtim  të kësaj shfaqje  thellësisht dramatike, thellësisht emocionale  nga Gjirokastra  me besimin që pagëzimi që  i bëri ky qytet kësaj shfaqje sonte ishte një shenjë që  shfaqja do të udhëtojë” –shprehet Kiço Londo regjisor.

Përgjatë sezonit artistik të vjeshtës në skenën e teatrit “Zihni Sako” do të ngjiten trupa vendase dhe të huaja duke gjallëruar jetën artistike në qytetin e Gjirokastrës.