Mokyr, Aghion dhe Howitt fitojnë Çmimin Nobel në Ekonomi për vitin 2025

Çmimi Nobel për Shkencat Ekonomike për vitin 2025 u është dhënë Joel Mokyr, Philippe Aghion dhe Peter Howitt “për shpjegimin e rritjes ekonomike të nxitur nga inovacioni”.

Mokyr do të marrë gjysmën e çmimit “për identifikimin e parakushteve për rritje të qëndrueshme përmes progresit teknologjik”, ndërsa  Aghion dhe Howitt do të marrin së bashku gjysmën tjetër “për teorinë e rritjes së qëndrueshme përmes shkatërrimit krijues”.

Çmimi i ekonomisë njihet zyrtarisht si Çmimi i Bankës së Suedisë në Shkencat Ekonomike në Kujtim të Alfred Nobelit.

Në vitin 1968, Sveriges Riksbank, banka qendrore e Suedisë, themeloi Çmimin Sveriges Riksbank në Shkencat Ekonomike në kujtim të biznesmenit dhe kimistit suedez të shekullit të 19-të, i cili shpiku dinamitin dhe themeloi pesë Çmimet Nobel.

Çmimi i parë në shkencat ekonomike iu dha Ragnar Frisch dhe Jan Tinbergen në vitin 1969. Që atëherë, është dhënë 56 herë për një total prej 96 laureatësh.

Puristët e Nobelit theksojnë se çmimi në ekonomi teknikisht nuk është një Çmim Nobel, por ai gjithmonë jepet së bashku me të tjerët në Ceremonitë e Dhënies së Çmimit Nobel më 10 dhjetor, në përvjetorin e vdekjes së Nobelit në 1896.

Ndërkohë, çmimet Nobel u njoftuan javën e kaluar në mjekësi, fizikë, kimi, letërsi dhe paqe .

LEXONI GJITHASHTU:

• Politikania opozitare venezueliane fiton çmimin Nobel për Paqen për vitin 2025