Histori tragjike si në filma, të dy pengje të Hamas! Çifti bashkohet pas 738 ditësh

Një çift izraelit që u rrëmbye gjatë sulmeve të Hamasit në vitin 2023 është ribashkuar, dy vjet pasi u ndanë me forcë.

Noa Argamani dhe Avinatan Or u rrëmbyen nga festivali i muzikës Nova më 7 tetor. Videoja ku zonja Argamani tërhiqej me frikë në pjesën e pasme të një motoçiklete nga luftëtarët e Hamasit u bë një nga imazhet më të njohura të sulmeve.

Ajo u shpëtua nga komandot gjatë një sulmi në kampin e refugjatëve Nuseirat më 8 qershor 2024, por zoti Or mbahej ndaras nga Hamas në qendër të Gazës, sipas mediave izraelite, para se të lirohej të hënën.

Në një postim në Instagram, zonja Argamani tha se tani çifti mund të fillojë “shërimin së bashku”.

Pas ribashkimit, mediat izraelite raportuan se ata ndanë “cigareten e parë së bashku pas dy vjetësh”.

Një ditë pas lirimit të partnerit të saj, zonja Argamani publikoi një postim emocional në Instagram, së bashku me fotot e tyre të para së bashku që nga viti 2023.

“Dy vjet nga momenti i fundit kur pashë Avinatanin, dashurinë time. Dy vjet që terroristët na rrëmbyen, më vendosën në motoçikletë dhe na ndanë para syve të gjithë botës,” shkroi ajo.

Ajo tha se ishte mbajtur së bashku me gra dhe fëmijë brenda shtëpive gjatë kapjes, “ndërsa Avinatan ishte vetëm në tunelë”.

“Hamas publikoi video dhe shenja jete nga unë, ndërsa nuk kishte asnjë informacion fare për Avinatanin,” vazhdoi postimi në hebraisht.

Ajo shtoi se tani mund të fillonin procesin e shërimit.

“Ne fituam luftën tonë personale dhe luftën e gjithë botës me ne për të arritur këtë moment, dhe tani është koha që të fillojmë udhëtimin tonë së bashku,” tha ajo.

Zonja Argamani falenderoi gjithashtu Trump për rolin e tij në kthimin e pengjeve në shtëpi dhe për ndihmën në “kapërcimin e errësirës”.

Babai i zotit Or i tregoi mediave izraelite kushtet ku ishte mbajtur i biri – ushqim “i pakët” dhe shumë kohë i vetëm, i lidhur me zinxhirë në tunelë gjatë 738 ditëve të kapjes.

“Ai është shumë i dobët,” tha Yaron Or për gazetarët, duke shtuar se djali i tij nuk kishte pasur “asnjë libër, asnjë kontakt njerëzor asgjë”.

LEXONI GJITHASHTU:

• Izraeli: Një nga trupat e kthyer nuk është peng, këtë e kanë bërë edhe më parë
• Protestuesit pro-palestinezë përleshen me policinë para ndeshjes Itali-Izrael