FMN rrit projeksionet, ekonomia shqiptare do të ruajë rritjen mbi 3.4%

Fondi Monetar Ndërkombëtar ka rishikuar projeksionet e tij për rritjen ekonomike të Shqipërisë, duke parashikuar një ecuri të qëndrueshme në mes të një mjedisi global të paqëndrueshëm.

Sipas raportit të Tetorit, ekonomia shqiptare pritet të zgjerohet me 3.4% në vitin 2025 dhe të shënojë një rritje të lehtë në 3.6% në vitin 2026. Ky parashikim sinjalizon besimin e FMN-së në qëndrueshmërinë e bazave makroekonomike të vendit.

Krahas rritjes, FMN parashikon që inflacioni mesatar të mbetet i kontrolluar. Për vitin 2025, inflacioni pritet të jetë 2.3%, ndërsa në vitin 2026 parashikohet një rritje e lehtë në 2.8%.

Në Ballkanin Perëndimor, Shqipëria pozicionohet në mesin e vendeve me rritje të lartë.

Në një plan më të gjerë, ekonomia globale pritet të rritet me 3.2% në 2025 dhe 3.1% në 2026, por FMN paralajmëron për një mjedis të paqëndrueshëm. Sfidat kryesore mbeten pasiguria politike e tregtare, rritja e proteksionizmit dhe goditjet e mundshme në tregjet financiare.

Për t’i bërë ballë kësaj situate, raporti thekson se politika të qëndrueshme, të besueshme dhe të parashikueshme janë thelbësore për të rikthyer besimin e investitorëve dhe për të ruajtur stabilitetin.

FMN vë në dukje rëndësinë e diplomacisë tregtare, ruajtjes së pavarësisë së bankave qendrore dhe zbatimit të reformave strukturore si prioritete jetike për perspektivën e rritjes.

LEXONI GJITHASHTU:

• Presidenti Begaj takim zyrtar me Orbanin në Hungari, në fokus ekonomia dhe integrimi
• Eurostat: Ekonomia shqiptare po rritet me ritme të qëndrueshme, por jo mirëqenia