Netanyahu ‘i vendosur’ të bëjë presion mbi Hamasin për të gjetur pengjet e vdekura

Kryeministri i Izraelit tha se është “i vendosur” të sigurojë kthimin e pengjeve të vdekura që janë ende brenda Gazës dhe se vendi do të vazhdojë të luftojë terrorizmin me “forcë të plotë”.

Benjamin Netanyahu i bëri komentet disa orë pasi Hamasi i ktheu trupat e dy pengjeve të tjera, por tha se nuk ishte në gjendje të kishte qasje te 19 të tjerët, shkruan BBC.

Në Izrael ka pasur zemërim që Hamasi ende nuk i ka kthyer të gjitha trupat në përputhje me marrëveshjen e armëpushimit në Gaza të javës së kaluar, megjithëse SHBA-të kanë minimizuar sugjerimin se kjo përbën një shkelje të saj.

Izraeli i është përgjigjur vonesës duke kërcënuar të kufizojë sasinë e ndihmës që vjen në Gaza.

Më herët të enjten, qeveria izraelite konfirmoi se dy trupa të dorëzuar nga Hamasi te Komiteti Ndërkombëtar i Kryqit të Kuq të mërkurën në mbrëmje ishin identifikuar si Inbar Hayman dhe Rreshter Maj Muhammad al-Atarash.

Kthimi i tyre, i cili u mbikëqyr nga persona të maskuar të Hamasit në Qytetin e Gazës, e çoi numrin e pengjeve të vdekur të kthyer që nga e hëna në nëntë nga 28.

Të 20 pengjet e gjalla u liruan të hënën, në këmbim të 250 të burgosurve palestinezë në burgjet izraelite dhe 1,718 të paraburgosurve nga Gaza.

Krahu ushtarak i Hamasit tha të mërkurën se do të vazhdojë kërkimin për trupat e mbetur, por se kjo do të kërkojë përpjekje të mëdha dhe pajisje të specializuara.

Të enjten, Netanyahu mbajti një fjalim në një ceremoni zyrtare përkujtimore në varrezat kombëtare të Malit Herzl në Jerusalem, dy ditë pas përvjetorit të sulmit të 7 tetorit sipas kalendarit hebraik.

Kryeministri tha se mbetet i përkushtuar për të siguruar kthimin e të gjithë pengjeve të vdekur izraelitë dhe të huaj dhe përsëriti gatishmërinë e qeverisë së tij për t’u rikthyer në veprime ushtarake nëse Izraeli sulmohet përsëri.

Ai tha: “Lufta jonë kundër terrorizmit do të vazhdojë me forcë të plotë. Nuk do ta lejojmë të keqen të ngrejë kokën. Do t’i kërkojmë çmimin e plotë kujtdo që na dëmton”.

Ushtria izraelite nisi një fushatë në Gaza në përgjigje të sulmit të 7 tetorit, në të cilin persona të armatosur të udhëhequr nga Hamasi vranë rreth 1,200 persona dhe morën peng 251 të tjerë.

Të paktën 67,967 njerëz janë vrarë nga sulmet izraelite në Gaza që atëherë, sipas ministrisë së shëndetësisë të territorit, shifrat e së cilës shihen nga OKB-ja si të besueshme.

LEXONI GJITHASHTU:

• SHBA-të hedhin poshtë pretendimet se Hamasi po shkel marrëveshjen e armëpushimit
• Ushtria amerikane thirrje Hamasit ta ndalë dhunën ndaj civilëve dhe të çarmatoset