Veterani i UÇK-së: 37 vjet në Hagë dhe Kurti nuk u çoj asnjë letër familjeve

Ditën e nesërme të 17 tetorit do të zhvillohet një protestë në Tiranë në mbrojtje të ish-krerëve të Ushtrisë Çlirimtare të Kosovës, të cilët po gjykohen në Hagë.

Në emisionin “Now”, ka folur Hysni Gucati, Kryetar i Organizatës së Veteranëve të Luftës së UÇK-së.

Gucati deklaroi se e mbështet këtë protestë në sheshin “Skënderbej”, duke u bërë thirrje qytetarëve pa dallim bindjeve politike, por jo vetëm, ftesën e drejton edhe ndaj kryeministrit të Kosovës Albin Kurtit.

Gucati shprehet se gjatë kohës së qëndrimit të tij në burg, ai dhe shumë qytetarë të tjerë që mbeten ende në qeli, nuk janë vizituar nga Albin Kurti.

“U bënë dy vjet që jam liruar nga burgu, dhe mua si qytetar i Kosovës, Albin Kurti nuk i ka dërguar asnjë letër familjes time. Nuk e kemi ndjerë kurrë në jetë mbështetjen e tij, as unë as asnjë. Të gjithë ata që janë në burg 8 apo 10 persona, Albin Kurti akoma deri më sot nuk e ka mbushur një obligacion 12 faqe me nënshkrime për t’i vizituar ata. Unë personalisht kam zhvilluar vizitë 5 herë.

Janë edhe procedura nuk është vetëm një vizitë. Ata janë qytetarë të Kosovës dhe duhet të interesohesh për qytetarin tënd. Prandaj Kurtit nuk dua ti besoj fare. Albin Kurti ka qenë në burg, i zënë peng i luftës”, tha Hysni Gucati.