Vrau 8-vjeçaren, dënohet me burgim të përjetshëm mësuesja në Korenë e Jugut

Një gjykatë në Korenë e Jugut ka dënuar me burgim të përjetshëm mësuesen e cila vrau me thikë nxënësen e saj 8-vjeçare në ambientet e shkollës. Mësuesja gjithashtu do të mbajë një pajisje elektronike gjurmimi për 30 vjet.

Myeong Jae-wan vrau nxënësen Kim Hae-neul në një klasë shkolle në Daejeon shkurtin e kaluar. Prokurorët kishin kërkuar dënimin me vdekje por gjykata vendosi dënimin burgim të përjetshëm. Gruaja e dënuar tha se do të reflektojë mbi gabimet e saj për pjesën tjetër të jetës së saj. Ajo madje i paraqiti gjykatës dhjetëra letra duke shprehur keqardhje.

48-vjeçarja tha se gjykimi i saj ishte i dëmtuar në kohën e vrasjes, pasi po i nënshtrohej trajtimit psikiatrik. Ajo kishte kërkuar një leje gjashtëmujore, duke përmendur depresionin por u kthye në shkollë pas 20 ditësh, pasi një mjek e deklaroi të aftë për punë.

Përpara goditjes me thikë, ajo kishte shfaqur sjellje të dhunshme, duke përfshirë edhe goditjen me shuplakë ndaj një mësuesi tjetër. Mëngjesin e ditës kur ajo vrau 8-vjeçaren, dy zyrtarë të arsimit kishin vizituar shkollën për të hetuar mosmarrëveshjen e mëparshme.

Myeong i tha policisë se kishte blerë një armë dhe e kishte sjellë në shkollë, duke planifikuar të vriste veten me një fëmijë të rastësishëm. Vajza u josh në korridorin e shkollës dhe u sulmua prej saj. 8-vjeçarja u raportua fillimisht e zhdukur dhe më vonë u gjet e therur për vdekje në shkollë së bashku me Myeong. Vrasësja kishte një plagë në qafë që dyshohet se ia kishte shkaktuar vetes