Përmbyset gomonia në brigjet e Bodrumit, humbin jetën 14 emigrantë

Një tragjedi me 14 të vdekur u regjistrua mbrëmjen e së enjtes në brigjet e Bodrumit, në Turqinë jugperëndimore. Mësohet se një gomone që transportonte emigrantë u fundos në det.

Roja Bregdetare Turke nisi një operacion kërkim-shpëtimi pas një telefonate pak pas mesnatës nga një afgan i cili arriti në një zonë shkëmbore dhe kërkoi ndihmë. Mësohet se në gomone ishin 18 emigrantë. Gomonia u përmbys dhjetë minuta pas nisjes së saj.

Anijet e Rojës Bregdetare Turke nxorën trupat e 14 personave, ndërsa dy të tjerë u shpëtuan. Operacioni i kërkim-shpëtimit vazhdon për të gjetur dy personat e zhdukur me pjesëmarrjen e katër anijeve të Rojës Bregdetare Turke dhe një helikopteri.

LEXONI GJITHASHTU:

• Përmbyset anija në Nigeri, zhduken më shumë se 100 persona
• Përmbyset anija me migrantë në brigjet e Libisë, 61 persona të vdekur