“Nuk kam mbaruar ende”, Kamala Harris: Ndoshta do të kandidoj për presidente

Ish-zëvendëspresidentja e SHBA-së, Kamala Harris, ka sugjeruar se mund të kandidojë përsëri për Shtëpinë e Bardhë, gjatë intervistës së saj të parë në Mbretërinë e Bashkuar për BBC.

Harris theksoi se beson fuqishëm se një ditë një grua do të mbajë presidencën e SHBA-së dhe nuk përjashtoi mundësinë që kjo të ndodhë gjatë jetës së mbesave të saj.

Duke folur për një kandidaturë të mundshme në vitin 2028, Harris tha: “Ndoshta do të jem unë”, duke lënë të kuptohet se po shqyrton seriozisht rikthimin në garën presidenciale, pas humbjes ndaj Donald Trump vitin e kaluar.

Ajo hodhi poshtë sondazhet që e rendisin atë si një kandidate të jashtme dhe vuri theksin tek përvoja e saj në politikë dhe angazhimi i saj i vazhdueshëm për shërbimin publik.

Harris kritikoi gjithashtu ish-presidentin Trump, duke e quajtur “tiran” dhe duke theksuar se paralajmërimet e saj gjatë fushatës për sjelljen e tij autoritare rezultuan të sakta.

Ajo përmendi përdorimin e institucioneve federale si “arma” për të ndëshkuar kritikët, si dhe presionin ndaj mediave dhe liderëve të biznesit që sipas saj janë dorëzuar lehtësisht ndaj kërkesave të tij.

Ish-zëvendëspresidentja nënvizoi se ende nuk ka marrë një vendim për kandidaturën, por se e sheh veten të vazhdojë të jetë aktive politikisht.

“Nuk kam mbaruar ende,” tha Harris, duke theksuar se karriera e saj ka qenë gjithmonë një jetë shërbimi dhe se angazhimi i saj në politikë do të vazhdojë.