64 të vrarë dhe 56 të arrestuar në operacionin më të madh policor në Brazil

Një operacion masiv policor në Brazil ka përfunduar me bilanc tragjik, ku 64 persona janë vrarë, mes tyre edhe katër efektivë policie. Aksioni u zhvillua në Rio de Janeiro dhe u cilësua si operacioni më i madh ndonjëherë kundër bandës së fuqishme “Comando Vermelho”.

Në operacion morën pjesë rreth 2,500 policë dhe 32 automjete të blinduara. Autoritetet arrestuan 56 persona dhe tentuan të ekzekutojnë rreth 250 urdhër-arreste. Për shkak të përplasjeve të armatosura, rreth 50 shkolla dhe institucione shëndetësore pezulluan aktivitetin, ndërsa linjat e transportit publik u devijuan për të shmangur zonat e rrezikshme.

“Ne qëndrojmë të vendosur kundër narkoterrorizmit”, shkroi guvernatori Claudio Castro në rrjetet sociale, duke mbështetur operacionin.

Ngjarja ndodhi vetëm pak ditë para se Rio de Janeiro të presë aktivitete të rëndësishme ndërkombëtare, si Samiti i Kryetarëve të Bashkive të C40 dhe Çmimi Earthshot i Princit William, të cilat janë pjesë e përgatitjeve për Konferencën e OKB-së për Klimën COP30, që do të zhvillohet në qytetin verior të Belem.

LEXONI GJITHASHTU:

• Presidenti i Brazilit: Një marrëveshje tregtare me SHBA-në do të arrihet së shpejti
• Avionët luftarakë izraelitë bombardojnë qytetin e Gazës pas urdhrit të Netanyahut