Korça Open Air 2025, Alket Islami: Test për zhvillimin e Kampionatit Botëror në 2029

Për herë të dytë, Korça Open Air do të organizohet në aerodromin e Lumalasit, ku do të marrin pjesë pjesë pilotët më të njohur shqiptarë, por edhe nga vende të ndryshme të Europës.

Sipas presidentit të Federatës së Aeronautikës, Alket Islami, Lumalasi ofron kushte të përshtatshme për fluturime të këtij lloji ndërsa me përfundimin e terminalit të aeroportit, krijohen mundësi të reja për pilotë që vijnë nga jashtë vendit.

“Lumalasi është qershia mbi tortë në Korçë për sportet e ajrit. Vitin e kaluar infrastruktura nuk ishte përfunduar ende, ndërsa tani është një test për zhvillimin e kampionatit botëror në 2029. Terminali i ri është luks, me gjithë shërbimet shtesë. Ky event do të ketë pilotët më të mirë të Europës,” tha Islami.

Migjen Shala, një nga pilotët më të mirë europianë, së bashku me pjesëtarë të tjerë të familjes, është pjesë e eventit.

“Nuk ka qenë e lehtë të renditesh në top 10 të botës; përpiqemi të shkojmë në top 3. Fluturoj me vëllain, vajzën e vëllait dhe djalin tim. Djali im është i 18-ti në botë dhe junior i tretë i botës. Çdo garë është emocion, sidomos kur ke pjesëtarë të familjes,” tha Shala.

Antonio Shvolcak, piloti slloven që ka nisur këtë sport në vitin 1978, është ende aktiv dhe fitues i shumë çmimeve ndërkombëtare.

“Kam nisur si parashutist në vitin 1978. Në Korçë kam qenë për herë të parë në 2011 dhe vazhdoj të fluturoj, kryesisht me stile të lira. Kam fituar çmime kampion në disa vende të Ballkanit dhe do të fluturoj sa të kem fuqi,” tha Shvolcak.

Mbi 40 parashutistë nga Shqipëria, rajoni dhe bota do të jenë pjesë e Korça Open Air për tre ditë. Sporti po merr gjithnjë e më shumë hov falë investimeve të bëra vitet e fundit.