Ministri Lavrov: Po bëhen përgatitje për një provë të mundshme bërthamore ruse

Ministri i Jashtëm rus, Sergei Lavrov ka deklaruar se ka filluar zbatimi i urdhrit të presidentit rus, Vladimir Putin për të përgatitur propozime në lidhje me një provë të mundshme bërthamore ruse.

“Urdhri i Presidentit Vladimir Putin, i dhënë në mbledhjen e Këshillit të Sigurisë më 5 nëntor, është zbatuar dhe puna është duke u zhvilluar. Publiku do të informohet për rezultatet”, tha Lavrov sipas TASS.

Vendimi i Kremlinit erdhi në përgjigje të njoftimit të papritur të presidentit të SHBA-së Donald Trump javën e kaluar se Shtetet e Bashkuara do të rifillonin testimet bërthamore. Lavrov tha se Rusia ende nuk ka marrë ndonjë sqarim nga Uashingtoni në lidhje me urdhrin e Trump.

Marrëdhëniet ruso-amerikane janë përkeqësuar ndjeshëm në javët e fundit, pasi Trump, i frustruar nga mungesa e përparimit drejt përfundimit të luftës në Ukrainë , anuloi një samit të planifikuar me Putinin dhe vendosi sanksione ndaj Rusisë për herë të parë që nga kthimi në Shtëpinë e Bardhë në janar.

LEXONI GJITHASHTU:

• Po mbillnin ullinj, kolonët izraelitë sulmojnë disa palestinezë dhe gazetarë
• Roja bregdetare greke shpëton 31 emigrantë