Gjueti e paligjshme në malin e Gramozit/ Kapen 3 persona, sekuestrohet arma e gjahut

Shërbimet e Policisë Kufitare Shtikë kanë parandaluar një rast të gjuetisë së paligjshme në malin e Gramozit, në kuadër të kontrolleve të vazhdueshme për mbrojtjen e faunës dhe parandalimin e veprimtarive të kundërligjshme.

Gjatë patrullimeve në terren, efektivët e policisë kanë kapur në flagrancë tre shtetas, të cilët posedonin një armë gjahu me të cilën dyshohet se do të kryenin gjueti të paligjshme.

Arma e gjahut është sekuestruar në cilësinë e provës materiale, ndërsa ndaj personave të përfshirë po vijojnë veprimet e mëtejshme procedurale.

Policia Kufitare thekson se kontrollet në zonat malore do të vijojnë me intensitet të lartë, me qëllim parandalimin e rasteve të ngjashme dhe mbrojtjen e mjedisit natyror.