Dështon formimi i qeverisë, Osmani nis konsultimet për zgjedhjet e parakohshme

Një ditë pas dështimit të votimit të Qeverisë së propozuar nga Glauk Konjufca, Presidentja e Kosovës, Vjosa Osmani, pritet të takohet këtë të enjte me drejtuesit e partive parlamentare për të diskutuar caktimin e datës së zgjedhjeve të parakohshme.

Takimin e ka konfirmuar Besian Mustafa, deputet i LDK-së dhe zëdhënës i partisë. Ai do të zhvillohet të enjten në ora 10:30.

PDK, LDK, AAK dhe Nisma kanë konfirmuar pjesëmarrjen në takimin e orës 10:30.

Të mërkurën Glauk Konjufca nuk arriti të marrë mandatin e kryeministrit pasi votimi për formimin e qeverisë së re dështoi me 56 vota pro, 53 kundër dhe 4 abstenime.

Pas këtij rezultati, partitë politike i kërkuan Presidentes Osmani që të caktojë sa më shpejt datën e zgjedhjeve të parakohshme.

Presidentja Osmani duhet të shpallë datën e zgjedhjeve, të cilat duhet të mbahen jo më vonë se 40 ditë nga dita e shpalljes.

Konjufca ishte figura e dytë e LVV-së, pas liderit të partisë, Albin Kurti, i cili nuk arriti të siguronte votat e nevojshme për qeverinë Kurti 3.

Kushtetuta e Kosovës parashikon që nëse edhe për herë të dytë nuk formohet qeveria e re, vendi shkon drejt zgjedhjeve të reja të parakohshme.

Kosova vazhdon të jetë me qeveri në detyrë, pas zgjedhjeve parlamentare të 9 shkurtit, duke u përballur me mungesën e një ekzekutivi të ri.

LEXONI GJITHASHTU:

• Dështon seanca e zgjedhjes së Kryeministrit në Kosovë, Konjufca nuk merr votat
• Sa janë gjasat që të bëhet kryeministër? Përgjigjet Glauk Konjufca